Ishrat Afreen
suno
tum ne mujhe takmil ka ehsas bakhsha hai
ki tum is jism men pahli tamanna ka shagufa ho
magar yuun hai
ki meri kokh men kilkariyon ki karvaton se qabl
andeshe ki konpal phuut nikli hai
main aksar sochti thi ye akela ghar kabhi abad bhi hoga
main us an-dekhe mehman ki pazirai men kya kya khvab bhejungi
main taq-e-jan men kaise kaise gul-bute sajaungi
main us ki ek ik jumbish pe izhar-o-bayan ke sab dariche khol kar
savan ke badal ki tarah
har rang men pagal hava ke saath har su phail jaungi
main ye bhi bhuul jaungi
ki us ik buund bhar rishte ke pichhe umr bhar ki sangsari hi muqaddar hai
main ye bhi bhuul jaungi
ki is hone ki lazzat aur zillat ne mujhe kya kya rulaya hai
main ye bhi bhuul jaana chahti thi
ki main kis jabr ke saae men pal kar
kaise andeshon ki chadar odh kar dahliz utri thi
ki main ne khud ko
bachpan aur javani ke gunahon ki hazaron lazzaton se
kis tarah mahrum rakkha hai
miri jaan main ye sab kuchh bhuul jaana chahti thi
main teri nannhi nannhi ungliyon ki konpalon ka lams pa kar raqs kar uthti
tiri kilkariyon ko soch kar tanhai men haule se muskati
magar yuun hai ki mere chaar su jo hashr barpa hai
bas ik khamosh matam ek be-avaz naala hai
main ankhen mundna chahun to ye kilkariyan
bhuke bilakte dard se behal bachche ki karahon men
badal jaati hain pal bhar men
miri muskan dhal jaati hai
tanha dard ki maari thaki haari hui aurat ki aahon men
thaki haari hui aurat ki jis ki sard banhon men
apahij din sisakta hai
musalsal khana-jangi qahat-sali bhuuk ghurbat aur vabaen
jis ke darvaze pe dastak de rahi hain
jihalat aur nafrat sarhadon ki pasbani kar rahi hai
jahan kheton men bas barud ugta hai
saron par tab-kari dhuup ki chadar tani hai
thaki haari hui aurat jo malbe par khadi fariyad karte
ye kin abadiyon ko yaad karti hai
main ankhen mundna chahun to ye manzar rulata hai
miri jaan us ghadi tu jis bhi pahlu kasmasata hai
mira dil haul khata hai
mire charon taraf ik khud-faramoshi ka jangal hai
ghanim ankhen jamae aur hava-e-shauq pagal hai
Leave a Reply