pahle-pahal laḌenge tamasḳhur uḌa.enge
jab ishq dekh lenge to sar par biTha.enge
tu to phir apni jaan hai tera to zikr kya
ham tere doston ke bhi naḳhre uTha.enge
‘ghalib’ ne ishq ko jo dimaghi ḳhalal kaha
chhoḌen ye ramz aap nahin jaan pa.enge
parkhenge ek ek ko le kar tumhara naam
dushman hai kaun dost hai pahchan ja.enge
qibla kabhi to taza-suḳhan bhi karen ata
ye char-panch ghazlen hi kab tak suna.enge
aage to aane dijiye rasta to chhoḌiye
ham kaun hain ye samne aa kar bata.enge
ye ehtimam aur kisi ke liye nahin
ta.ane tumhare naam ke ham par hi a.enge
Leave a Reply