Raz Chandpuri
pachhtane se kya hasil pachhtane se kya hoga
kuchh tu ne kiya hoga kuchh tujh se hua hoga
jiine ka maza jab hai jiine ka ho kuchh hasil
yuun laakh jiye koi to jiine se kya hoga
pursish ki nahin hajat pursish ki zarurat kya
ma.alum hai sab tujh ko jo kuchh bhi hua hoga
jab tak hai ḳhudi dil men hogi na pazira.i
be-kar hain ye sajde in sajdon se kya hoga
jaisi bhi guzarti hai ai ‘raz’ guzarti hai
aghaz-e-mohabbat hai anjam men kya hoga
Leave a Reply