pabandi-e-auqat-e-dua kis ke liye hai
raton ki ibadat ka sila kis ke liye hai
hain kis ke liye madh-bhari ankhon ke ishare
gulnar se honTon ki faza kis ke liye hai
ham log dua denge tiri zulf-e-siyah ko
malum ho ye shahr-e-saba kis ke liye hai
kya naam hai us shaḳhs-e-javan-baḳht ka ai dost
ḳhalvat ki ye dhimi si sada kis ke liye hai
ḳhvabon ke tarab-zar men ye kaun mila tha
tanha.i men tu naghma-sara kis ke liye hai
ara.ish-o-taz.in ka ḳhayal aaya hai kab se
hathon pe ye tahrir-e-hina kis ke liye hai
kaun aa.ega ḳhvabon ke dhundlakon se tire paas
ankhon men ye paigham-e-vafa kis ke liye hai
ai parda-nashin sharm-o-haya ḳhuub hai lekin
aḳhir vo tiri shoḳh ada kis ke liye hai
itna to bata de tire ma.asum se dil men
ye mahshar-e-jazbat bapa kis ke liye hai
Leave a Reply