Jahan Ara Tabassum
niind meri hai ḳhvab logon ke
hain mire sar azaab logon ke
muflisi ke khanDar se ai mire dil
chal nikalen shabab logon ke
gulsitan ko lahu se sinchungi
tab khilenge gulab logon ke
apni qismat men TuuTe taare hain
mahtab aftab logon ke
ik taraf iltifat hai tera
ik taraf iztirab logon ke
yunhi pahunchi nahin main daar talak
main ne ulTe naqab logon ke
apni apni hain dars-gahen yahan
apne apne nisab logon ke
Leave a Reply