niind ankhon men rahe phir bhi na soya jaa.e
main vo patthar huun ki ro.uun to na roya jaa.e
ajnabi hai tire ḳhush-rang badan ki ḳhushbu
ik zara lams-e-vafa tujh men samoya jaa.e
shab ke sahra ne ajab pyaas likhi hai mujh men
mujh ko ḳhurshed ke sho.alon men Duboya jaa.e
main ne tanha.i men jal kar bhi yahi chaha hai
ḳhushbuon se tire anchal ko bhigoya jaa.e
zindagi ko hai zarurat na.e pairahan ki
apne hi ḳhuun men apne ko Duboya jaa.e
Leave a Reply