Ramz Azimabadi
nigah tuur pe hai aur jamal siine men
ye kaifiyat hai tira naam le ke piine men
junun ko hosh kahan sanvle mahine men
khila hua hai chaman aarzu ka siine men
chaman men jab bhi tire pairahan ki bu aa.i
bahar bhiig ga.i sharm se pasine men
yunhi nahin hai surur-e-shab-e-firaq ai dost
kaTi hai raat sitaron ka nuur piine men
tiri nigah men hai sirf ḳhatra-e-girdab
ye dekh saikḌon tufan men safine men
jahan giren mire aansu gulab khil jaa.en
bhara hua hai lahu dil ke abgine men
yuun muskura ke tira ansuon ko pi jaana
koi to raaz hai ai ‘ramz’ aise jiine men
Leave a Reply