nigah-e-qahr-parvar ko bhi tamhid-e-ḳhushi samjhe
samajhna hai to koi ham se raz-e-zindagi samjhe
vafaon ka natija ham to jo kuchh hai samajhte hain
magar ai kaash anjam-e-jafa vo bhi kabhi samjhe
use dair-o-haram men jazbiyyat kya nazar aa.e
jo teri diid ko asl-e-mazaq-e-bandagi samjhe
hamen to ḳhair jo kuchh aap ne chaha vo samjhaya
magar ye to zara samjha.iye kuchh aap bhi samjhe
bhala ‘naḳhshab’ tire is be-niyazana ravayye ko
kamal-e-qurb jaane ya mohabbat ki kami samjhe
Leave a Reply