Yazdani Jalandhari
nigah-e-naz ka hasil hai e’tibar mujhe
hava-e-shauq zara aur bhi nikhar mujhe
kabhi zaban na khuli arz-e-mudda.a ke liye
kiya hai pas-e-adab ne bhi sharmsar mujhe
purane zaḳhm na.e daagh saath saath rahe
mili to kaisi mili da.avat-e-bahar mujhe
phir ahl-e-hosh ke narghe men aa gaya huun main
ḳhuda ke vaste ik baar phir pukar mujhe
bikhar rahi hai mohabbat ki raushni har su
uḌa raha hai koi surat-e-ghubar mujhe
na jaane kaun sa hai sho.abada ta.aqub men
ki aaj us ne kaha hai vafa shi.ar mujhe
jo aap aa.en to ye faisla bhi ho jaa.e
dikha.i deta hai mausam to ḳhush-gavar mujhe
hazar baar sukun-e-hayat ki had men
hazar baar kiya dil ne be-qarar mujhe
mire shabab miri zindagi mire maazi
zaban-e-hal se ik baar phir pukar mujhe
vo baat jis pe madar-e-vafa hai ‘yazdani’
vo baat kahna paḌegi huzur-e-yar mujhe
Leave a Reply