Nazron Se Basirat Ki Nihan Kuchh Bhi Nahin Hai

nazron se basirat ki nihan kuchh bhi nahin hai

sab kuchh hai jahan aur jahan kuchh bhi nahin hai

ham miT ga.e is fitrat-e-ashufta ki ḳhatir

halanki vo gharat-gar-e-jan kuchh bhi nahin hai

dil ki jo na kahiye to zaban kashif-e-asrar

aur dil ki jo kahiye to zaban kuchh bhi nahin hai

dil valon ko dil valon se hai harf-o-hikayat

zahir men mohabbat ka nishan kuchh bhi nahin hai

rangin-o-nazar soz-o-manazir se guzar kar

pahuncha huun vahan main ki jahan kuchh bhi nahin hai

ye ishq ki zahir ho to hil jaa.en do-alam

juz chand isharat nihan kuchh bhi nahin hai

mujh ḳhugar-e-begani-e-dost ko ‘ali’

be-gangi-e-ahl-e-jahan kuchh bhi nahin hai