Ali Jawwad Zaidi
naya mai-kade men nizam aa gaya
uThin bandishen izn-e-am aa gaya
nazar men vo kaif-e-davam aa gaya
ki goya kisi ka payam aa gaya
mohabbat men vo bhi maqam aa gaya
ki mizhgan pe ḳhuun lab pe naam aa gaya
sar-e-rah kanTe bichhata hai shauq
junun ko bhi kuchh ehtimam aa gaya
na ilzam un par na aghyar par
ye dil aap hi zer-e-dam aa gaya
badal hi gaya bazm-e-ishrat ka rang
mira naghma-e-dard kaam aa gaya
kidhar se ye sanki mahakti hava
kidhar se vo nazuk-ḳhiram aa gaya
tamasha nahin tha mira iztirab
koi kyuun ye bala-e-bam aa gaya
bayan ho raha tha fasana mira
magar bar-bar un ka naam aa gaya
kabhi samne kuchh ḳhamoshi rahi
kabhi duur se kuchh payam aa gaya
jo dar-o-rasan se bhi rukta nahin
saron men vo sauda-e-ḳham aa gaya
vo ‘zaidi’ vahi rind-e-atish-nava
vo zinda dilon ka imaam aa gaya
Leave a Reply