nava-e-shauq men shorish bhi hai qarar bhi hai
khirad ka paas bhi khvabon ka karobar bhi hai
hazar baar baharon ne dukh diya mujh ko
na jaane kya kya hai baharon ka intizar bhi hai
jahan men ho gai na-haq tiri jafa badnam
kuchh ahl-e-shauq ko dar-o-rasan se pyaar bhi hai
mire lahu men ab itna bhi rang kya hota
taraz-e-shauq men aks-e-rukh-e-nigar bhi hai
mire safine ko sahil ki justuju hi nahin
sitam ye hai kisi tufan ka intizar bhi hai
chaman hi ik nahin aina meri masti ka
gavah josh-e-junun ki zaban-e-khar bhi hai
ghurur-e-ishq ghurur-e-vafa ghurur-e-nazar
‘surur’ tere gunahon ka kuchh shumar bhi hai