nasim-e-sub.h-e-bahar aa.e dil-e-hazin ko qarar aa.e
kali kali le ke munh-andhere sabahat-e-ru-e-yar aa.e
udaas raton ki tirgi men na koi taara na koi jugnu
kisi ka naqsh-e-qadam hi chamke to nuur ka e’tibar aa.e
ye sho.ala-samani-e-takallum ye a.ina-ḳhana-e-tabassum
jigar se jaise dhuan sa uTThe nazar ko jaise ḳhumar aa.e
usi ki ḳhatir ḳhizan-zada dil ne jama-e-chak apna badla
ki jashn-e-jamhur inqilab-e-chaman ka a.ina-dar aa.e
Leave a Reply