nahin duniya men siva ḳhar-o-ḳhas-e-kucha-e-dost
sar-e-shorida ki ḳhvahish ba-kulahe gaahe
ḳhun-e-ushshaq ka da.ava mire qatil tujh par
hote isbat na dekha ba-gavahe gaahe
hai bahar aane ki kuchh dhuum ki aage to na tha
dil-e-divana ba-in hal-e-tabahe gaahe
rahte kis shohre men ho tum se to milna pyare
ittifaqiya hai ba.ad az do sah maahe gaahe
ham tamazat men tire hukm se len hain saaqi
saya-e-tak men yak-lahza panahe gaahe
ham gadaon ko hai taslim-o-raza se sarokar
multaji hain na ze-mun.im ne ze-shahe gaahe
be-zaban kulah-e-sabzi ki jagah ai nau-ḳhat
na uga ḳhaak se meri par-e-kahe gaahe
ai ‘muhib’ jurm-e-mohabbat ke siva aalam men
qatl-e-ashiq hi suna hai ba-gunahe gaahe
Leave a Reply