Hajra Noor Zaryab
nahin aao ki ab avaz-e-pa se choT lagti hai
mire ehsas par teri sada se choT lagti hai
tujhe ḳhud apni majburi ka andaza nahin shayad
na kar ahd-e-vafa ahd-e-vafa se choT lagti hai
ye sab baten munasib hain magar phir bhi mere hamdam
taghaful ki tire halki ada se choT lagti hai
havao tum zara Thahro na ḳhushbu aise bikhrao
huun nazuk main mujhe bad-e-saba se choT lagti hai
ye ḳhat apne sambhalo tum hasin lamhe bhi le jaao
hamen aisi mohabbat ki ata se choT lagti hai
tumhare ba.ad rangini koi bhati nahin mujh ko
hatheli ko bhi ab rang-e-hina se choT lagti hai
miri dhaḌkan men jin be-tabiyon ne Dera Daala hai
unhi be-tabiyon ki intiha se choT lagti hai
bahut hassas hai ‘zaryab’ ko jhukna nahin aata
qaba phulon ki bhi ho to qaba se choT lagti hai
Leave a Reply