mujhi se puchh raha tha mira pata koi
buton ke shahr men maujud tha ḳhuda koi
ḳhamoshiyon ki chaTanon ko toḌne ke liye
kisi ke paas nahin tisha-e-sada koi
daraḳht haath uTha kar salam karte the
mire junun ka mubarak tha marhala koi
samajh saka na magar koi pattharon ki zaban
har ek lamha laga bolta hua koi
ye band lab hain ki koi khuli hui si kitab
mire saval pe is dam to bolta koi
varaq pe raat ke likkhi hai sub.h ki tahrir
ye ek vaqt hai be-rang-o-nur sa koi
na harf harf hua aks-e-guftugu mera
samajhna chaho to le aao a.ina koi
ik an.suon ka samundar tha jal-pari ka libas
mila to aaise mila paikar-e-vafa koi
har ek zehan men apne hi band hai ‘majid’
faza ke ḳhol se bahar hai rasta koi
Leave a Reply