Ainuddin Azim
mujhi men jiita hai suraj tamam hone tak
main apne jism men aata huun shaam hone tak
ḳhabar mili hai mujhe aaj apne hone ki
kahin ye jhuuT na ho jaae aam hone tak
kahan ye jur.at-e-iz.har thi kisi shai men
sukut-e-shab se mire ham-kalam hone tak
ye puḳhtagi thi ghamon men na dhaḌkanon men sabat
tumhare dard ka dil men qayam hone tak
ye chand taare miri dastaras se duur nahin
ki fasle hain mire tez-gam hone tak
guzar rahe hain nazar se nazar milae baghair
Thahar bhi jaiye ek ek jaam hone tak
diye bujha diye jaate hain sub.h tak ‘azim’
mira havala diya us ne naam hone tak
Leave a Reply