Fauziya Rabab
misal-e-sham.a jala huun dhuan sa bikhra huun
main intizar ki har kaifiyat se guzra huun
sab apne apne diyon ke asiir paa.e ga.e
main chand ban ke ka.i anganon men utra huun
kuchh aur baḌh ga.i barish men bebasi apni
na baam se na kisi ki gali se guzra huun
pukarti thi mujhe sahilon ki ḳhamoshi
main Duub Duub ke jo baar baar ubhra huun
kyuun itna mere ḳhayalon men bas gaya hai koi
kabhi kisi ke tasavvur se main bhi guzra huun
koi to aaj mujhe aankh bhar ke dekhega
main aaj apne lahu men naha ke nikhra huun
Leave a Reply