Yasmeen Hameed
misal-e-aks mire aaine men dhalta raha
vo khadd-o-khal bhi apne magar badalta raha
main pattharon pe giri aur khud sambhal bhi gai
vo khamushi se mire saath saath chalta raha
ujala hote hi kaise use bujhaungi
agar charagh mira ta-ba-subh jalta raha
main us ke maani o maqsad ke sang chunti rahi
vo ek harf jo ehsas ko kuchalta raha
zamin khulus ki mitti se be-niyaz rahi
rifaqaton ka shajar vahimon pe palta raha
Leave a Reply