milo to aise andheron ko bhi pata na lage
chalo to aise ke jismon men fasla na lage
main aaj gaanv men chhoḌe to ja raha huun tumhen
dua karo ki mujhe shahr ki hava na lage
ḳhuda vo vaqt na laa.e hamare bachchon par
ki jis ghaḌi unhen maaon ki bhi dua na lage
main us ka zikr kisi aur se nahin karta
kahin ye mera ravayya use bura na lage
ye tai kiya hai ki aisa fasana likkhunga
vo bevafa kisi jumle se bevafa na lage
biTha gaya tha koi aise peḌ ke niche
ki jis ka ek bhi patta mujhe hara na lage
ata kiye hain yuun hi us ne rat-jage ‘ishrat’
ye zindagi mujhe ḳhvabon ka silsila na lage
Leave a Reply