Milne Ka Imkan Banae baiThe Ho

milne kā imkān banā.e baiThe ho

kis ko dil aur jaan banā.e baiThe ho

barsīñ āḳhir bārish jaise kyoñ āñkheñ

tum bādal mehmān banā.e baiThe ho

dasht kī ḳhaak sameTī maiñ ne palkoñ se

ghar apnā dālān banā.e baiThe ho

kis ke aane kī ummīd meñ āḳhir yuuñ

raste ko gul-dān banā.e baiThe ho

kaun kisī kī yaad bhulā.ī jaane ko

tum āñgan shamshān banā.e baiThe ho

qasmeñ va.ade jhūTe jis kī ḳhātir tum

dil apnā vīrān banā.e baiThe ho

tanhā tanhā rahte ho ‘āsim’ ‘tanhā’

ye kaisī pahchān banā.e baiThe ho

Leave a Comment