Chander Wahid
meri rahon men tire naqsh-e-qadam rahne de
mujh pe lillah mahz itna karam rahne de
TuuTe dipak ko haTa mat tu mire aage se
meri nazron ko ujale ka bharam rahne de
aks apna koi dekhe hai mire ashkon men
aur kuchh der miri ankhon ko nam rahne de
sha.ir-e-vaqt haqiqat men vahi hota hai
apne sheron men jo dushvariyan kam rahne de
vo na bhule se bhi dekhenge tujhe ai ‘vahid’
un ki nazron se ye umid-e-karam rahne de
Leave a Reply