meri ḳhabar na lena ai yaar hai ta.ajjub
ji se bache jo mujh sa bimar hai ta.ajjub
vada-ḳhilafiyon se teri hai dil men shub.ha
hove jo hashr men bhi didar hai ta.ajjub
tum kahte ho ki vo aata hai paas tere
us yaar se to yaaro bisyar hai ta.ajjub
hasti se ik nafas ka hai fasla adam tak
tis par bhi hai pahunchna dushvar hai ta.ajjub
kaafi na tha tumhare abru ka ik ishara
khinchi jo ashiqon par talvar hai ta.ajjub
sau baar din-o-iman gum ho.e to ajab kya
TuuTe jo ahd-e-ulfat ik yaar hai ta.ajjub
kyunkar kaTegi yarab auqat gham-zadon ki
koi nahin jahan men gham-ḳhvar hai ta.ajjub
naseh mira gareban siine ka fikr mat kar
sabut us men paana ik taar hai ta.ajjub
pamal dil kiye hain aalam ke har qadam men
sikhi ye tum ne kis se raftar hai ta.ajjub
gaali hui hai ab to takiya-kalam tera
sidhi zaban kasu se guftar hai ta.ajjub
islam men ye kaisa inkar kufr se hai
tasbih men piro.e zunnar hai ta.ajjub
divana hai ‘muhib’ tu teri shikasta-hali
dekhe jo aankh uTha kar dildar hai ta.ajjub
har baat men jo kahiye majbur hai qabahat
insan ko gar samjhiye muḳhtar hai ta.ajjub
kuchh gu-magu hai yaaro ye amr bandagi ka
afkar hai achambha iqrar hai ta.ajjub
Leave a Reply