Abdul Ahad Saaz
miri jholi men vo lafzon ke moti daal deta hai
sivae is ke kuchh mangun to hans kar taal deta hai
sujhata hai vahi rasta bhi un se bach nikalne ka
jo in aankhon ko khvabon ke sunahre jaal deta hai
mira ik karobar-e-jazba-o-alfaz hai us se
mire jazbon ko pighla kar vo misre dhaal deta hai
haqiqat ghol rakhta hai vo rumanon ke paani men
manazir thos deta hai nazar sayyal deta hai
utar aata hai vo shokhi pe yuun bhi mehrbani ki
mire ik sher ki mohlat ko maah o saal deta hai
Leave a Reply