Meri Jaan Sarsari Milne Se Kya Malum Hota Hai

Syed Nazeer Hasan Sakha Dehlavi

miri jaan sarsari milne se kya malum hota hai

parakhne se bashar khota khara malum hota hai

tumhare dil men aur mera tasavvur ho nahin sakta

tumhare dil men koi dusra malum hota hai

tire qadmon se ye virana jannat ho gaya goya

mujhe duniya se apna ghar juda malum hota hai

mujhe tum bevafa kahte ho achchha bevafa huun main

magar ye muddai ka muddaa malum hota hai

tumhare dil men jo kuchh aae pinhan rah nahin sakta

tumhara dil to koi aina malum hota hai

adl ki shakl se zahir us ka dil shikasta hai

chaman men aur koi gul khila malum hota hai

faqiron ki sada sun kar mire dhoke men kahte hain

sikha malum hota hai ‘sakha’ malum hota hai