mere zarre ke muqaddar men hai sahra hona
ik na ik roz hai mujh ko bhi huvaida hona
shayad is vaste pahchan tiri mushkil hai
itna asan nahin ḳhud se shanasa hona
itna biina huun ki gulshan ki hava-ḳhvahi men
dekh sakta nahin shaḳhon ka barahna hona
dekh is daur men alam-o-masa.ib ke hujum
dekh is daur men insan ka tanha hona
kitna asan hai sar kaTte phirna ‘bedi’
kitna mushkil hai zamane ka masiha hona
Leave a Reply