mere ḳhush-a.ind-mustaqbil ka paighambar bhi tu
meri barbadi ka meri jaan pas-manzar bhi tu
tu ki fitrat ki tarah hai kis tarah tasḳhir ho
yaar ḳhush-manzar bhi tu ziddi bhi tu ḳhud-sar bhi tu
ik tazad-e-husn-e-ma.ani hai tiri ta.amir men
dastaras men bhi giraft-e-vaqt se bahar bhi tu
tere chehre se ayaan us ke na milne ka alam
ḳhush-nazar aata nahin us shaḳhs se mil kar bhi tu
mere fan ki saari zeba.ish tiri nisbat se hai
jo chhupa hai mere sheron men vo danish-var bhi tu
ruuh to pahle bhi thi ab ke badan bhi hai asiir
ab to yuun lagta hai jaise ho mira paikar bhi tu
tu hi sang-e-mil hai apne liye sultan-‘rashk’
apne hi raste men jo haa.il hai vo patthar bhi tu
Leave a Reply