Mera Dil-E-Nashad Jo Nashad Rahega

mera dil-e-nashad jo nashad rahega

aalam dil-e-barbad ka barbad rahega

ta-der jo hangama-e-fariyad rahega

shak hai ki kahin alam-e-ijad rahega

pabandi-e-aqdar men azad rahega

lekin ye tira jaur-o-sitam yaad rahega

dil apne hi hathon se jo barbad rahega

afsana-e-nakami-e-fariyad rahega

dil sust to lab tishna-e-fariyad rahega

ab farhat-e-nashad to nashad rahega

dil mahv-e-chaman hai to nigahon men chaman hai

paband-e-qafas ho ke bhi azad rahega

ghairon ka karam raas na aa.ega na aaya

aalam dil-e-barbad ka barbad rahega

‘farhat’ tire naghmon ki vo shohrat hai jahan men

vallah tira rang-e-suḳhan yaad rahega