Muneer Saifi
mira dil bhi muamma ho gaya hai
bhari-mahfil men tanha ho gaya hai
baḌa asan jiina ho gaya hai
garan phir lamha lamha ho gaya hai
jo rota tha mire zaḳhmon pe yaaro
vo a.ina bhi andha ho gaya hai
nazar aata nahin insan koi
hamara shahr sahra ho gaya hai
koi bhi shai qarine se nahin hai
ajab dil ka gharaunda ho gaya hai
mira ghar muntazir hai raushni ka
zamane men savera ho gaya hai
kahan hai ghair janib-dar koi
adu saara zamana ho gaya hai
shab-e-gham muḳhtasar hone lagi hai
mariz-e-hijr changa ho gaya hai
falak par aj-kal hi aise-vaise
ghurub apna sitara ho gaya hai
jise main qatl kar aaya tha ‘saifi’
vahi ab mujh men zinda ho gaya hai
Leave a Reply