maut ik darinda hai zindagi bala si hai
sub.h bhi udasi hai shaam bhi udasi hai
apni intiha par ham shayad ibtida men hain
tab bhi bebasi thi ab bhi be-libasi hai
badalon ko aana hai lauT kar isi janib
ye zamin hi pyasi thi ye zamin hi pyasi hai
ye bhi ek ne.amat hai kaash tum samajh paao
zindagi ke andar jo apne ik ḳhala si hai
janta to sab kuchh hai vo bhi mere baare men
kya karen jo zalim men ḳhu-e-na-shanasi hai
farq hai to ham men hai vaqt ek jaisa hai
san chhiyanve hai ye ya ki san chhiyasi hai
Leave a Reply