maujudgi ka us ki asar hone laga hai
sab us ke siva mahv-e-nazar hone laga hai
atraf mire ḳhaak uḌa karti hai aksar
tai ab miri janib bhi safar hone laga hai
purkhon se chali aati hai ye naql-e-makani
ab mujh se bhi ḳhali mira ghar hone laga hai
jaldi se main ab us ki taraf ruḳh nahin karta
a.ina mira sina-sipar hone laga hai
tartib anasir ki bigaḌne lagi shayad
aalam mira ab zer-o-zabar hone laga hai
ab sang-dili mujh se chhupa.e nahin chhupti
ankhon se numudar sharar hone laga hai
arsa koi darkar hua karta tha ‘rahi’
ab roz koi marka sar hone laga hai
Leave a Reply