Mast-E-Nigah-E-Naz Ka Arman Nikaliye

Sahir Dehlavi

mast-e-nigah-e-naz ka arman nikaliye

be-ḳhud bana ke bazm se ai jaan nikaliye

husn-e-nazara-soz ki hain lan-taraniyan

arman-e-did musi-e-imran nikaliye

pinhan hai kufr ishq men iman-e-ashiqan

zulmat se nur-e-chashma-e-haivan nikaliye

dam bhar men dho.e ja.enge sab dagh-e-ma.asiyat

yak qatra ashk tajraba-saman nikaliye

tauhid men hai naqsh-e-do-rangi hijab-e-zat

zauq-e-nazar ka hausla ai jaan nikaliye

jab jalva-ha-e-vadi-e-aiman nazar men hon

ḳhatir se vahm-e-rauza-e-rizvan nikaliye

dil ko bana ke nuqta-e-parkar-e-afiyat

pa-e-talab ba-himmat-e-mardan nikaliye

zikr-e-ḳhafi azal se hai vird-e-dil-o-zaban

shak hai to tan se tar-e-rag-e-jan nikaliye

kaunain ain-e-ilm men hai jalva-gah-e-husn

jeb-e-ḳhirad se ainak-e-irfan nikaliye

har jaam men hai aks-e-ruḳh-e-yar jalva-gar

ai dil sabil-e-sohbat-e-rindan nikaliye

maqbuliyat suḳhan ki hai ‘sahir’ jo rang-e-bazm

rang-e-ayar-e-tab-e-suḳhan-dan nikaliye