Syed Hamid
masarrat men bhi hai pinhan alam yuun bhi hai aur yuun bhi
surud-e-zindagi men zer-o-bam yuun bhi hai aur yuun bhi
ghamon se hai gareban men ita.at ka gila kyuun ho
do guuna baar hai sar par vo ḳham yuun bhi hai aur yuun bhi
tariq-e-ḳhusravi bhi hai kinaya hai ki mah ham hain
unhen zeba hai ham kahna ye ham yuun bhi hai aur yuun bhi
kamar ki justuju se kya dahan ki aarzu kyuun ho
mohabbat ke marahil men adam yuun bhi hai aur yuun bhi
lagi hain maut par ankhen magar hai diid ki hasrat
ye vaqt-e-naz.a hai ankhon men dam yuun bhi hai aur yuun bhi
qasam khaa.i hai ulfat ki ḳhuda rakkhe use qaa.em
phansi hai jaan mushkil men qasam yuun bhi hai aur yuun bhi
tiri dariya-dili saaqi hamari tishna-kami se
ḳhajil kaise na ho miina men kam yuun bhi hai aur yuun bhi
hasin jaise koi murat ho dil rakhta hai patthar ka
vo kafir kyuun bura maane sanam yuun bhi hai aur yuun bhi
masarrat men dil-e-hirman-zada ko ḳhauf hai gham ka
nahin mumkin mafar gham se ki gham yuun bhi hai aur yuun bhi
karen mashq-e-taghaful ya jafa.en aap farma.en
yahan taslim ki ḳhu se karam yuun bhi hai aur yuun bhi
nadamat hai jafaon par shikayat par itaab un ko
jabin ka haal kya kahiye ki nam yuun bhi hai aur yuun bhi
mughan se is ko ulfat hai ayaan chehre se vahshat hai
koi ḳhadim se kya puchhe ajam yuun bhi hai aur yuun bhi
Leave a Reply