Sarmad Sahbai
marne ka pata de mire jiine ka pata de
ai be-ḳhabari kuchh mire hone ka pata de
ik dusre ki ahaTon pe chalte hain sab log
hai koi yahan jo mujhe raste ka pata de
ḳhud aap se bichhḌa huun main is andhe safar men
ai tirgi-e-shab mire saa.e ka pata de
is aas pe har a.ine ko joḌ raha huun
shayad koi reza mire chehre ka pata de
guzri hai miri umr sarabon ke safar men
ai reg-e-ravan ab kisi chashme ka pata de
har pal kisi aahaT pe mire kaan lage hain
jaise abhi koi tire aane ka pata de
bikhra hua huun sadiyon ki be-ant tahon men
mujh ko koi kho.e hue lamhe ka pata de
dahliz dilasa hai na divar amaan hai
ai dar-badri mere Thikane ka pata de
huun qaid hisar-e-rag-e-girdab men ‘sarmad’
koi nahin jo mujh ko kinare ka pata de
Leave a Reply