maraz-e-ishq jise ho use kya yaad rahe
na dava yaad rahe aur na dua yaad rahe
tum jise yaad karo phir use kya yaad rahe
na ḳhudai ki ho parva na ḳhuda yaad rahe
lotte saikdon naḳhchir hain kya yaad rahe
chiir do siine men dil ko ki pata yaad rahe
raat ka vaada hai bande se agar banda-navaz
band men de lo girah ta ki zara yaad rahe
qasid-e-ashiq-e-sauda-zada kya laae javab
jab na malum ho ghar aur na pata yaad rahe
dekh bhi lena hamen raah men aur kyuun sahab
ham se munh pher ke jaana ye bhala yaad rahe
tere mad.hosh se kya hosh o ḳhirad ki ho ummid
raat ka bhi na jise khaya hua yaad rahe
kushta-e-naz ki gardan pe chhuri phero jab
kaash us vaqt tumhen nam-e-ḳhuda yaad rahe
ḳhaak barbad na karna miri us kuche men
tujh se kah deta huun main bad-e-saba yaad rahe
gor tak aae to chhati pe qadam bhi rakh do
koi be-dil idhar aae to pata yaad rahe
tera ashiq na ho asuda ba-zer-e-tuba
ḳhuld men bhi tire kuche ki hava yaad rahe
baaz aa jaaen jafa se jo kabhi aap to phir
yaad ashiq ko na kijega bhala yaad rahe
dagh-e-dil par mire phaha nahin hai angara
charagar liijo na chutki se utha yaad rahe
zaḳhm-e-dil bole mire dil ke namak-ḳhvaron se
lo bhala kuchh to mohabbat ka maza yaad rahe
hazrat-e-ishq ke maktab men hai talim kuchh aur
yaan likkha yaad rahe aur na padha yaad rahe
gar haqiqat men hai rahna to na rakh ḳhud-bini
bhule banda jo ḳhudi ko to ḳhuda yaad rahe
alam-e-husn ḳhudai hai buton ki ai ‘zauq’
chal ke but-ḳhane men baitho ki ḳhuda yaad rahe