”khuda-e-bartar
ye dariyush-e-buzurg ki sarzamin
ye nau-shervan-e-adil ki dad-gahen
tasavvuf o hikmat o adab ke nigar-khane
ye kyuun siyah-post dushmanon ke vajud se
aaj phir ubalte hue se nasur ban rahe hain?”
ham is ke mujrim nahin hain jan-e-ajam nahin hain
vo pahla angrez
jis ne hindostan ke sahil pe
la ke rakkhi thi jins-e-sauda-gari
ye us ka gunah hai
jo tire vatan ki
zamin-e-gul-posh ko
ham apne siyah qadmon se raundte hain!
ye shahr apna vatan nahin hai
magar farangi ki rahzani ne
isi se na-char ham ko vabasta kar diya hai
ham is ki tahzib ki bulandi ki chhipkili ban ke rah gae hain
vo rahzan jo ye sochta hai
”ki asia hai koi aqiim o amiir beva
jo apni daulat ki be-panahi se mubtala ik fishar men hai
aur us ka aghosh-e-arzu-mand va mire intizar men hai
aur eshiyai
qadim khvaja-saraon ki ik nazhad-e-kahil
ajal ki rahon pe tez-gami se ja rahe hain”
magar ye hindi
gurisna o pa-barahna hindi
jo salik-e-rah hain
magar rah-o-rasm-e-manzil se be-khabar hain
gharon ko viran kar ke
lakhon saubaten sah ke
aur apna lahu baha kar
agar kabhi sochte hain kuchh to yahi
ki shayad unhi ke baazu
najat dilva sakenge mashriq ko
ghair ke be-panah biphre hue sitam se
ye sochte hain:
ye hadsa hi ki jis ne phenka hai
la ke un ko tire vatan men
vo aanch ban jaae
jis se phunk jaae
vo jarasim ka akhada
jahan se har baar jang ki bu-e-tund uthti hai
aur duniya men phailti hai!
main janta huun
mire bahut se rafiq
apni udaas be-kar zindagi ke
daraz o tarik faslon men
kabhi kabhi bhediyon ke manind
aa nikalte hain rahguzaron pe
justuju men kasi ke do ”saq-e-sandalin” ki
kabhi darichon ki ot men
na-tavan patingon ki phadphadahat pe
hosh se be-niyaz ho kar vo tutte hain
vo dast-e-sail
jo samne un ke phailta hai
is aarzu men
ki un ki bakhshish se
para-e-nan mann-o-salva ka ruup bhar le
vahi kabhi apni nazuki se
vo rah sujhata hai
jis ki manzil pe shauq ki tishnagi nahin hai!
tu in manazir ko dekhti hai!
tu sochti hai:
ye sang-dil apni buz-dili se
firangiyon ki mohabbat-e-na-ravan ki zanjir men bandhe hain
inhi ke dam se ye shahr ubalta hua sa nasur ban raha hai!
mohabbat-e-narava nahin hai
bas ek zanjir
ek hi ahani kamand-e-azim
phaili hui hai
mashriq ke ik kinare se dusre tak
mire vatan se tire vatan tak
bas ek hi ankabut ka jaal hai ki jis men
ham eshiyai asiir ho kar tadap rahe hain
mughul ki subh-e-khun-fishan se
farang ki sham-e-jan-sitan tak!
tadap rahe hain
bas ek hi dard-e-la-dava men
aur apne alam-e-jan-guza ke
is ishtirak-e-giran-baha ne bhi
ham ko ik dusre se ab tak
qarib hone nahin diya hai!
Leave a Reply