Mahfil Mein Shor-E-Qulqul-E-Mina-E-Mul Hua

mahfil men shor-e-qulqul-e-mina-e-mul hua

la saqiya pyala ki tauba ka qul hua

jin ki nazar chadha tira rukhsar-e-atishin

un ka charagh-e-gor na ta-hashr gul hua

banda-navaziyan to ye dekho ki aadmi

juzv-e-zaif mahram-e-asrar-e-kul hua

dariya-e-gham se mere guzarne ke vaste

tegh-e-khamida yaar ki lohe ka pul hua

parvana bhi tha garm-e-tapish par khula na raaz

bulbul ki tang-hauslagi thi ki ghul hua

aai tahi-daron ki na hargiz samajh men baat

avaza go buland misal-e-duhul hua

us bin raha chaman men bhi main ‘zauq’ dil-kharash

nakhun se tez-tar mujhe har barg-e-gul hua

Leave a Comment