mahaul se jaise ki ghuTan hone lagi hai
be-kaifiyati uzv-e-badan hone lagi hai
kuchh farq sa mahsus nahin sham-o-sahar men
uThne ke tasavvur se thakan hone lagi hai
mafqud hui ḳhunki-e-ehsas nazar se
sabzon ko bhi dekhe se jalan hone lagi hai
kuchh us se gila bhi hai kuchh apni bhi ḳhata.en
yuun us ke tasavvur se chubhan hone lagi hai
hassas bhi imroz tabi.at se zyada
aur tez bhi kuchh bu-e-saman hone lagi hai
pahle bhi tiri baat hi markaz thi suḳhan ka
ab yaad tiri sarf-e-suḳhan hone lagi hai
ai ‘taj’ tire ek nasheman ke hasad men
aa dekh ki taḳhrib-e-chaman hone lagi hai
Leave a Reply