Tabish Dehlvi
mah-o-parvin tah-e-kamand rahe
kin fazaon men ham buland rahe
gham-e-hasti se be-niyaz sahi
ahl-e-dil phir bhi dard-mand rahe
chashm-e-uqda-kusha se bhi na khule
ham kuchh is tarah band band rahe
bar-sar-e-dar ham sahi lekin
harf-e-haq ki tarah buland rahe
husn ki ḳhud-numa.iyan tauba
muddaton ham bhi ḳhud-pasand rahe
mai-o-masti nahin hai us pe haram
mai-kade men jo hosh-mand rahe
ham hain rahbar se do qadam aage
hausle shauq se do-chand rahe
dushmanon ka gila nahin ‘tabish’
dost bhi darpai-e-gazand rahe
Leave a Reply