likh likh ke ansuon se divan kar liya hai
apne suḳhan ko apni pahchan kar liya hai
aḳhir haTa diin ham ne bhi zehn se kitaben
ham ne bhi apna jiina asan kar liya hai
duniya men ankhen kholi hain mundne ki ḳhatir
aate hi lauTne ka saman kar liya hai
sab log is se pahle ki devta samajhte
ham ne zara sa ḳhud ko insan kar liya hai
jin nekiyon pe chal kar ajdad kitne ḳhush the
ham ne unhi pe chal kar nuqsan kar liya hai
har baar apne dil ki baten zaban pe la kar
ham ne musibaton ko mehman kar liya hai
aksar hua hai marne ki maang kar dua.en
phir ham ne zindagi ka arman kar liya hai
ik dil ke TuTne par rota hai koi itna
jhonke ko ḳhud hamin ne tufan kar liya hai
socha bhi hai ki daana banne ki koshishon men
kya haal apna tu ne nadan kar liya hai
kuchh is tarah guzara hai zindagi ko ham ne
jaise ki ḳhud pe koi ehsan kar liya hai
Leave a Reply