le chala jaan miri ruuth ke jaana tera
aise aane se to behtar tha na aana tera
apne dil ko bhi bataun na thikana tera
sab ne jaana jo pata ek ne jaana tera
tu jo ai zulf pareshan raha karti hai
kis ke ujde hue dil men hai thikana tera
aarzu hi na rahi subh-e-vatan ki mujh ko
sham-e-ghurbat hai ajab vaqt suhana tera
ye samajh kar tujhe ai maut laga rakkha hai
kaam aata hai bure vaqt men aana tera
ai dil-e-shefta men aag lagane vaale
rang laaya hai ye lakhe ka jamana tera
tu khuda to nahin ai naseh-e-nadan mera
kya khata ki jo kaha main ne na maana tera
ranj kya vasl-e-adu ka jo taalluq hi nahin
mujh ko vallah hansata hai rulana tera
kaaba o dair men ya chashm-o-dil-e-ashiq men
inhin do-char gharon men hai thikana tera
tark-e-adat se mujhe niind nahin aane ki
kahin nicha na ho ai gor sirhana tera
main jo kahta huun uthae hain bahut ranj-e-firaq
vo ye kahte hain bada dil hai tavana tera
bazm-e-dushman se tujhe kaun utha sakta hai
ik qayamat ka uthana hai uthana tera
apni ankhon men abhi kaund gai bijli si
ham na samjhe ki ye aana hai ki jaana tera
yuun to kya aaega tu fart-e-nazakat se yahan
sakht dushvar hai dhoke men bhi aana tera
‘dagh’ ko yuun vo mitate hain ye farmate hain
tu badal daal hua naam purana tera
Leave a Reply