Lapke Junun-Shiar Yake-Baad-Digre

lapke junūñ-shi.ār yake-ba.ad-dīgre

paayā farāz-e-dār yake-ba.ad-dīgre

lab-basta bastiyoñ kā phir anjām ye huā

sab kā luTā qarār yake-ba.ad-dīgre

ye kyā ki ahl-e-dil hī ke hisse meñ aa.e haiñ

ilzām be-shumār yake-ba.ad-dīgre

dil kā kamāl hai mutazalzal nahīñ huā

kitne hue haiñ vaar yake-ba.ad-dīgre

in mas.aloñ ne Dhañg se jiine kahāñ diyā

sar par rahe savār yake-ba.ad-dīgre

miTte dikhā.ī dete haiñ afsos ai ‘na.īm’

achchhe sabhī shi.ār yake-ba.ad-dīgre

Leave a Comment