lamhe shab-e-visal ke sarf-e-visal ho ga.e
us ko bhi niind aa ga.i ham bhi niDhal ho ga.e
kaise hasin log the kaisi hasin mahfilen
vo jo ḳhayal-o-ḳhvab the ḳhvab-o-ḳhayal ho ga.e
main bhi tha rashk-e-a.ina tum bhi the rashk-e-a.ina
main bhi sifal ho gaya tum bhi sifal ho ga.e
mujh ko thi un ki zaat se aisi musabqat ki bas
jab main bana misal to vo be-misal ho ga.e
chashm vo naz-afrin khul ke baras paḌen kahin
ham se ka.i nihal-e-gham phir se nihal ho ga.e
balon men barf thi yahan ḳhvahish bhi sard thi yahan
us ne jo aanch di to ham sho.ala-ḳhisal ho ga.e
gutthi hai utni gunjlak asrar-e-ka.enat ki
jitne mire javab the saare saval ho ga.e
kaya-kalap hui hai yuun gurgan-e-dasht-e-sus ki
girya-kunan jamal-ju zohra-jamal ho ga.e
Leave a Reply