lamha lamha vus.at-e-kaun-o-makan ki sair ki
aa gaya so ḳhuub main ne ḳhak-dan ki sair ki
ek lamhe ke liye tanha nahin hone diya
ḳhud ko apne saath rakkha jis jahan ki sair ki
tujh se mil kar aaj andaza hua hai zindagi
pahle jitni ki vo goya ra.egan ki sair ki
niind se jaage hain koi ḳhvab bhi dekha hai kya
dekha hai to boliye shab-bhar kahan ki sair ki
thak gaya tha main badan men rahte rahte ek din
bhaag nikla aur ja kar asman ki sair ki
yaad hai ik ek gosha naqsh hai dil par hanuz
sair to vo hai jo shahr-e-dil-baran ki sair ki
phuul hairat se hamen dekha kiye vaqt-e-visal
gul-badan ke saath ‘azar’ gulistan ki sair ki
Leave a Reply