laakh nadan hain magar itni saza bhi na mile
charasazon ko miri sham-e-bala bhi na mile
hasrat-agin to hai nakami-e-manzil lekin
lutf to jab hai ki ḳhud apna pata bhi na mile
kuchh nigahon se gham-e-dil ki ḳhabar milti hai
varna ham vo hain ki baton se hava bhi na mile
ḳhvahish-e-dad-rasi kya ho sitam-gar se jahan
aankh men sha.iba-e-uzr-e-jafa bhi na mile
is qadar qaht-e-basirat bhi nahin ai vaa.iz
ham buton ke liye niklen to ḳhuda bhi na mile
ishq vo arsa-e-pur-ḳhar hai hamdam ki jahan
zindagi raas na aa.e to qaza bhi na mile
kya qayamat hai tabi.at ki ravani ‘varis’
koi DhunDhe to nishan-e-kaf-e-pa bhi na mile
Leave a Reply