lagi hai bhiiḌ baḌa mai-kade ka naam bhi hai
kuchh is men ḳhub-e-rindan-e-tishna-kam bhi hai
junun-e-shauq ne dil ko kiya tabah magar
kuchh is men tere taghaful ka ehtimam bhi hai
kitab-e-zist hai yaksar hikayat-e-gham-e-dil
hikayat-e-gham-e-dil harf-e-na-tamam bhi hai
sukun-e-ahl-e-ḳharabat-e-ishq kya kahiye
ruki ruki si yahan umr-e-tez-gam bhi hai
butan-e-shahr ham ahl-e-vafa se hain be-zar
butan-e-shahr ko ahl-e-vafa se kaam bhi hai
vo shaḳhs apni jagah hai muraqqa-e-tahzib
ye aur baat hai ki qatil usi ka naam bhi hai
charagh-e-sub.h ki afsurdagi nahin tanha
kahin qarib yahin aftab-e-sham bhi hai
dar-e-sanam pa ruke hain magar ba-zer-e-qadam
hazar silsila-e-gardish-e-mudam bhi hai
jo ḳhalvaton men sukut-ashna raha sadiyon
vahi ‘ravish’ se sar-e-bazm ham-kalam bhi hai
Leave a Reply