laga.en aag hi dil men ki kuchh ujala ho
kisi bahane to is ghar ka bol-bala ho
numud-e-sub.h ko kaise kare jahan taslim
koi kiran ho kahin naam ko ujala ho
na tum mile na ye duniya-e-gham hi raas aa.i
tum hi batao ki is gham ka kya izala ho
ajab ajab si hain afvahen garm zindan men
ajab nahin ki isi shab yahan ujala ho
phir us ki baat ka kaise yaqin aa jaa.e
vo jis ki baat ka andaz hi nirala ho
kashan kashan hi chalo ye ravish hi behtar hai
kahin na zikr ho apna na kuchh havala ho
Leave a Reply