kyuun ai gham-e-firaq ye kya baat ho gai
ham intizar-e-subh men the raat ho gai
bahke hue bhatakte hue karvan ki khair
rahbar se rahzan ki mulaqat ho gai
divangi ki khair na mangen to kya karen
divangi hi raz-e-inayat ho gai
sinon men soz-o-saz-e-mohabbat nahin raha
duniya rahin-e-gardish-e-halat ho gai
lo Dubton ne dekh liya nakhuda ko aaj
taqrib kuchh to bahr-e-mulaqat ho gai