Abdul Mannan Tarzi
kya yahan dekhiye kya vahan dekhiye
aap hi aap hain ab jahan dekhiye
ghar jala dekhiye vo dhuan dekhiye
aag pahunchi kahan se kahan dekhiye
dekhiye ta-kamar zulf ka shoabada
uljhanen ban gaiin dastan dekhiye
mujh ko maalum hai aap maasum hain
jal gaya hoga yuun hi makan dekhiye
bujh gai shama parvane rukhsat hue
lut gaya shauq ka karvan dekhiye
ishq roz-e-azal se mata-e-yaqin
husn hai aaj bhi bad-guman dekhiye
aaiye mere dil men bhi vaqt-e-ghazal
ek dariya-e-atish ravan dekhiye
husn ki ehtiyat-e-hasin dekh kar
ishq ka iltihab-garan dekhiye
is tamashe ka jab aap ko shauq hai
ham jalate hain apna makan dekhiye
ismat-e-dil hai aur gham ka atish-kada
aag ban jaegi gulistan dekhiye
ishtiyaq-e-jabin apna dekhenge ham
aap virani-e-astan dekhiye
aap ke samne aur tab-e-sukhan
khush-bayan kitne hain be-zaban dekhiye
tuur hi ki tarah jal na jaae kahin
jalva-bari se pahle makan dekhiye
ramz-o-ima ghazal ki agar jaan hain
aap ‘tarzi’ ka husn-e-bayan dekhiye
Leave a Reply