Bedam Shah Warsi

Kya Gila Is Ka Jo Mera Dil Gaya

kya gila is ka jo mera dil gaya

mil gae tum mujh ko sab kuchh mil gaya

jis ko ankhen DhunDhti thiin pa gaiin

dil ko jis ki justuju thi mil gaya

is gul-e-raana ne hans kar baat ki

ghuncha-e-khatir hamara khil gaya

chhod kar tu us ko ghairon se mila

khaak men jo teri khatir mil gaya

ban gai har mauj ik mauj-e-sarab

tishna-lab jab main lab-e-sahil gaya

arz-e-hal-e-chak-e-dil kyunkar karun

samne un ke gaya munh sil gaya

ghair hi kya be-rukhi se aap ki

aaj ‘bedam’ bhi bahut be-dil gaya

More Poems

Leave a Comment